ماتستاهل ابجيلك حرامات

ماتستاهل ابجيلك حرامات ولاتاخذ بعد من عيني دمعه
جنت ازرع ورد بس هسه مجبورحته الباقي منهن راح اشلعه
أيس مابقتلك يمي اسرار وحته اليدك باب الروح ادفعه
بقى يمي الشمع بس ذوبه الليل وانه متاني الصبح يطلع واشيعه
عرفتك ثوب بس ماتستر العيب المايرهم علي مجبور انزعه
جنت اخجل واعبرلك حجی هوای واعرف بي جذب بس كلت اسمعه
وهسه اتكطعت وياك الدروب وبقه درب الخجل بلساني اكطعه
كرهتك كثر ماودعت الشموع شمعه بعيني تحله وتطفه شمعه
جنت كبر الجرح شايل معاناة وصدك جان الكلب من ينعه ينعه
جن داخل حسن لو طلعت الاخ وتطلع روحي الك وتردهه فدعه
حسبتك رقم من لمعة البيك وين ادري الصفر هم ينطي لمعه
وين ادري الغصن بيه يركض الموت وعلى عش المحنه يودي الافعه
باجر راح اجفن كل الجروح ونعش الذكريات براسي اشيعه
وباجر راح اهدم بيت الدموع وابني من الفرح بعيوني قلعه
وتذبل شفتك وترد اليه زحوف وانه بجفي النهر وبكيفي اكطعه
وأكلك كلشي مات اللهفه والشوك محال اليندفن تكدر ترجعه
وسود تصير كلهه ايامك البيض وينذل خاطرك ويعض اصبعه
مثل ماجرعتني بكاسك الموت كاس الذل شرط باجر ترجعه